I Kigali: DGPR Yashishikariza Abaturage Gukoresha Bisi Hagamijwe Kugabanya Ihumana ry’Ikirere

Mu gihe ihindagurika ry’ikirere rikomeje guteza impungenge i Kigali, Ishyaka Riharanira Demokarasi no Kurengera Ibidukikije mu Rwanda (Democratic Green Party of Rwanda – DGPR) ryagaragaje ko hakenewe ubwikorezi rusange bwiza buzafasha abaturage kugabanya gukoresha imodoka zabo bwite.

Imibare ya Leta igaragaza ko ihindagurika ry’ikirere mu Rwanda, cyane cyane i Kigali, buri ku rwego ruteje impungenge, aho uduce duto tw’igipimo cy’umwuka w’ihumana ry’ikirere cyiri munsi ya milimetero 2.5 (PM2.5) iri ku kigero cy’inshuro eshanu hejuru y’urwego rwemewe n’Ishami ry’Ubuzima ku Isi (WHO). Umunyamabanga mukuru w’iri shyaka,akaba na depite mu nteko ishinga amategeko Hon Jean Claude Ntezimana , yavuze ko gukoresha imodoka nyinshi zitwara umuntu umwe gusa mu buryo bwihariye byongera ihumana ry’ikirere, kandi ko uburyo bwiza bw’ubwikorezi rusange bushobora kugabanya izi ngaruka.

Hon. Jean Claude Ntezimana ati: “Hakenewe kongera imbaraga mu kunoza ubwikorezi rusange buriho. Iyo bisi imwe itwaye abantu 52, bisobanuye ko imodoka 52 zivuye mu muhanda. Iyo dufite uburyo bwiza, busukuye kandi bufite internet ya Wi-Fi, abantu benshi barabukoresha.”

Ntezimana kandi yasobanuye mu Nama y’Ishyaka ya DGPR yabereye i Kigali ku wa 20 Ukuboza, aho hatorewe abayobozi bashya ku rwego rw’Umujyi ndetse hanatanzwe amahugurwa ku iterambere rishingiye ku bidukikije.

Jacqueline Uwera, Komiseri w’Ishyaka ushinzwe Ibidukikije, yashishikarije urubyiruko n’abagore kuba ku isonga mu bukangurambaga bwo kurengera ibidukikije. Yagize ati: “Kurengera ibidukikije bitangirira mu rugo, bikagera ku mudugudu no ku kagari. Gukoresha bisi aho gukoresha imodoka bwite ni intambwe nziza.”

Uwera yanagaragaje ibibazo by’imicungire mibi y’imyanda, gutema amashyamba n’ihumana ry’ikirere, asaba abanyamuryango gufata ingamba zifatika.

Abayobozi bashya b’urubyiruko na bo bavuze ko bazibanda ku gukangurira urubyiruko gukoresha imbuga zisanzwe zihuza abaturage, Umuganda n’inama z’abaturage, mu kurengera ibidukikije.

Ebo Kampat Morunziza , Umuyobozi w’Urubyiruko muri DGPR ku rwego rw’Umujyi, yavuze ko kurengera ibidukikije ari inshingano zaburi wese kandi ari igisubizo ku bibazo by’ubuzima biterwa n’ihumana ry’ikirere.

Charlotte Umutesi, Perezida w’Abagore muri DGPR, we avuga ko abagore bafite uruhare rukomeye mu kugabanya imyanda ya pulasitiki, kubungabunga amashyamba no gukoresha ingufu zidahumanya. Yongeyeho ko gutanga urugero mu ngo no mu baturanyi bifasha mu guhindura imyitwarire y’abaturage.

Iyi Nteko Rusange ya DGPR i Kigali yanaranzwe n’itora ry’abayobozi 99 mu turere twa Gasabo, Kicukiro na Nyarugenge, bikaba byiyongera ku ivugururwa ry’ubuyobozi bushingiye ku baturage rimaze gukorwa mu turere 29 hirya no hino mu gihugu. Uyu murimo w’abayobozi bashya ukomeje gushimangira icyerekezo cy’ishyaka cyo guteza imbere ubwikorezi burambye n’imijyi isukuye, hashingiwe ku gukangurira abaturage, cyane urubyiruko n’abagore, kugira uruhare mu gukemura ibibazo by’ihumana ry’ikirere.