Abamamazabuhinzi 311 bahawe inshingano zo kuvugurura ubuhinzi

Mu gihe u Rwanda rukomeje gushyira imbaraga mu kuvugurura gahunda y’ubuhinzi n’ubworozi, abamamazabuhinzi 311 bashoje amahugurwa, bahawe impamyabumenyi zemewe ku rwego rw’igihugu basabwe gukoresha ubumenyi bungutse banabera ibisubizo n’imbaraga bogera umusaruro w’abahinzi, ndetse banahangana n’ihindagurika ry’ikirere.

Izi mpamyabushobozi zatangiwe mu muhango wo gusoza Imurikabikorwa Mpuzamahanga ry’Ubuhinzi n’Ubworozi (Agrishow)  ku nshuro ya 19 ryabereye ku Mulindi mu Mujyi wa Kigali ku wa 31 Nyakanga, ryitabiriwe n’abamurika ibikorwa barenga 670 baturutse mu Rwanda no mu mahanga.

Abarangije aya mahugurwa harimo abajyanama b’ubuhinzi 234 bakorera ku byanya bigega n’abakozi 77 ba One Acre Fund. Bahawe ubumenyi ku buhinzi bwa kijyambere, kubungabunga ubutaka, gukoresha inyongeramusaruro neza no gufasha abahinzi gukoresha uburyo bugezweho bwo kongera umusaruro wabo.

Mukeshimana Drocella, ushinzwe iyamamaza buhinzi mu Murenge wa Kibuye mu Karere ka Burera, yavuze ko inshingano bafite ari uguhindura uburyo abahinzi bahingangamo babereka uburyo bwiza bwo guhinga kinyamwuga.

Ati: “Tuzigisha abahinzi guhinga kinyamwuga kugira ngo babashe kubona kongera umusaruro kandi wujuje ubuziranenge, kandi uwo musaruro nibawugera uzabafasha kwihaza ndetse banasagurire amasoko.”

Yongeyeho ko bahawe ubumenyi buzabafasha kwigisha abahinzi uburyo bwo guhangana n’imihindagurikire y’ikirere no gukoresha neza ubutaka kugira ngo bakomeze kubona umusaruro uhagije.

Dushimiyimana Erik, umwe mu bahwe impamyabushobozi, yavuzeko uruhare rwabo rutarangiriye mu mahugurwa gusa ahubwo ko ari bwo batagiye, cyane ko bagomba kugira uruhare mu mpinduka z’ubuhinzi batanga umusaruro ugaragara.

Yavuze ko aho bazashyira mu bikorwa ubu buryo bushya umusaruro uziyongera, aho ibiriyi bizava kuri toni 5 cyagwa 10 kuri hegitari ushobora  kugera kuri toni 20 na 25.

Mu gusoza iri murikabikorwa, hanashimiwe abantu n’ibigo byagaragaje udushya twafasha kwihutisha iterambere ry’ubuhinzi n’ubworozi.

Mu bworozi, Kivu Choice Ltd yo mu Karere ka Nyamasheke yabaye iyambere kubera ibikorwa by’ubworozi bw’amafi no guhanga imirimo ku rubyiruko b’abagore. Mu buhinzi, KOTUARU yo mu Karere ka Burera yahembwe kubera gukoresha uburyo bwa ZAI Pit, bufasha kugarura uburumbuke n’ubuhehere bw’ubutaka.

Mu cyiciro cyo gutunganya umusaruro wavuye mu biribwa, Umwiza Bakery yegukanye umwanya wa mbere nyuma yo gukora imigati, amndazi na keke bikozwe mu birayi n’ibijumba, mu gihe mu bushakashatsi Kaminuza y’u Rwanda yegukanye ibihembo bibiri.

Uryubyiruko n’abagore bafite imishinga mu rwego rw’ubuhinzi n’ubworozi na bo bahebwe ibihembo by’amafaranga y’u Rwanda biri hagati ya miliyoni ibyeri na eshanu, hagamijwe kubafasha kwagura ibikorwa byabo.

Minisitiri w’Ubuhinzi n’Ubworozi, Dr Ndabamenye Telesphore, yavuze ko gahanga udushya no gukorera hamwe ari byo bizafasha ubuhindi bw’u Rwanda guhangana n’ibibazo birimo imihindagurikire y’ikirere, indwara z’ibihingwa n’amatungo ndetse n’izamuka ry’ibiciro by’inyongeramusaruro.

Yashimangiye ko Guverinoma izakomeza gushigikira ubushakashatsi, ikoreshwa ry’ikoranabuhanga n’ishoramari mu rwego rwo kingera umusaruro no guteza imbere ubuhinzi bushingiye ku iterambere n’ubumenyi.

Umuyobozi mukuru ushinzwe guhuza ibikorwa bya One Acre Fund na Leta y’u Rwanda, Sonia Muhikaze, yavuzeko kuva mu 2015 ubufatanye bw’uyu muryango na Leta bamaze kugera ku bahinzi basaga miliyoni ebyeri, ndetse ibikorwa by’iyamamazabuhinzi bikaba byariyongereye ku kigero cya 400%.

Yavuze kandi ko icyiciro cya mbere cy’abahawe aya mahugurwa cyagize uruhare mu kongera umusaruro w’ubuhinzi ku kigero cya 16%, binyuze mu gukoresha neza inyongeramusaruro no kubungabunga ubutaka.

Imurikabikorwa ry’Ubuhinzi n’Ubworozi rya 19 ryari rifite insanganyamatsiko igira iti “Twihutishe ivugururwa ry’ubuhinzi n’ubworozi binyuze mu guhanga ibishya ndetse n’ubufatanye.” Iri murikabikorwa ry’ubuhinzi n’ubworozi, ryabaye urubuga rwo guhuriramo abahinzi, aborozi, abashakashatsi, abikorera n’abafatanyabikorwa bagaragaza ibisubizo bishya bishobora kwihutisha iterambere rw’ubuhinzi n’ubworozi mu Rwanda.