MINAGRI yasabye abahinzi kwitegura imvura nyinshi iteganyijwe mu gihembwe cya 2027A
Minisiteri y’Ubuhinzi n’Ubworozi (MINAGRI) yasabye abahinzi gutangira imyiteguro y’igihembwe cy’ihinga cy a 2027A ibi ibitangaje nyuma y’uko hateganyijwe imvura nyinshi muri iki gihembwe.
Igihembwe cya 2027Akizatangira muri Kanama kigeze mu Kuboza, iki gihembwe gishobora gutanga umusaruro mwinshi ku bahinzi biteguye neza bagahinga neza.
MINAGRI ivuga ko iki gihembe gishobora kuzatanga igice kinini cy’umusaruro w’ibihingwa bitandukanye, aho iki gihembwe gishobora gutanga umusaruro nibura 70% by’ibigori, 54% by’ibirayi, 49% by’umuceri na 47% by’ibishyimbo nibura buri mwaka.
Intego nyamukuru y’iki gihembwe cya 2027A, ni ukongera umusaruro uboneka kuri hegitari w’ibihingwa byatoranyijwe, guteza imbere umusaruro w’ibikomoka ku buhinzi byoherezwa mu mahanga ndetse no gukomeza ingamba zo guhangana n’ingaruka z’imihindagurikire y’ikirere.
Mu rwego rwo kubigeraho, Minisiteri isaba ubufatanye hagati y’abahinzi, inzego z’ibanze, abashinzwe iyamamazabuhinzi. Ndetse n’abatanga inyongeramusaruro n’abandi bafatanyabikorwa bagira uruhare mu gutegura no gushyira mu bikorwa ibikorwa by’igihembwe cy’ihinga.
Abahinzi basabwe kwitegura igihembwe cya 2027A
Kubera imvura nyinshi iteganyijwe muri Kanama, abahinzi basabwe kwitegura bacurakura mirwanya suri no guca inzira y’amazi kugira ngo birinde iyangirika ry’ubutaka n’ibindi bibazo bishobora guterwa n’imvura nyinshi.
Muri ibyo bikorwa harimo gutunganya imirwanyasuri, ibyobo bifata amazi, imigende n’imiyoboro itwara amazi mu bishanga no mu byanya byuhirwa.
Basabwe kandi gukoresha ubutaka bwose bushobora guhingwa, haba ku misozi, mu bishanga no mu nkuka zabyo, mu mibande ndetse no mu mibande.
MINAGRI kandi yasabye abahinzi kongera umusaruro usarurwa kuri hegitari bakoresha imbuto z’indobanure n’ifumbire mvaruganda bagendeye ku bipimo byagenwe.
Mu turere duteganywamo ibikorwa by’ubuhinzi bubungabunga ubutaka, abahinzi basabwe kubishyira mu bikorwa hakiri kare kuko bifasha kongera umusaruro.
Mu bice bikunze kugira izuba ryinshi, abahinzi basabwe guhitamo ibihingwa byihanganira izuba no gucukura ibyobo bifata amazi, banakomeza ibikorwa byo kurwanya isuri.
Harimo gutera ubwatsi bufata ubutaka n’ibiti ndumburabutaka ku miringoti, ndetse no gusibura imigende n’imiyoboro itwara amazi, mu rwego rwo kugabanya ibyago by’ibiza bishobora guterwa n’imvura nyinshi.
Ubwishingizi bw’ibihingwa n’amatungo
MINAGRI kandi yashishikarije abahinzi n’aborozi kwitabira ubwishingizi bw’ibihingwa n’amatungo butangwamo Nkunganire ya Leta, nk’uburyo bwo kubafasha guhangana n’igihombo gishobora guterwa n’imihindagurikire y’ikirere.
Abahinzi basabwe kandi kwita ku bihingwa bihora mu mirima, birimo urutoki n’ikawa, babifumbira, babisasira kandi bagakurikiza inama bahabwa n’abashinzwe iyamamazabuhinzi.
Ku bijyanye no kurinda umusaruro, basabwe kugenzura kenshi ibihingwa no gufata ingamba zo kurwanya indwara n’ibyonnyi byagaragara mu mirima kugira ngo bitangiza umusaruro.
Basabwe kandi gutegura hakiri kare uburyo bwo kubika no gufata neza umusaruro uzaboneka, kuwushakira amasoko no kugirana amasezerano n’abaguzi.
Ifumbire izakoreshwa muri 2027A yazamutseho ibiciro
Mu gihembwe cy’ihinga cya 2027A, hateganyijwe gukoreshwa toni 60,000 z’ifumbire mvaruganda.
MINAGRI yatangaje ibiciro bishya by’ifumbire, aho bimwe mu bwoko bwayo byazamutseho ugereranyije n’ibiciro byari bisanzweho.
Ikiro cya Urea cyazamutse kivuye kuri 1,190 Frw kigera kuri 1,980 Frw, bikaba bihwanye n’izamuka rya 66%.
NPK 17-17-17 (Compound) yazamutse ivuye kuri 1,369 Frw ku kilo igera kuri 1,861 Frw, ni ukuvuga izamuka rya 36%, mu gihe NPK 17-17-17 (Blend) yazamutse ivuye kuri 1,330 Frw igera kuri 1,780 Frw ku kilo, izamuka rya 34%.
Nubwo ibi biciro byazamutse, MINAGRI yatangaje ko Nkunganire ya Leta izakomeza gutangwa ku ifumbire mvaruganda mu gihembwe cya 2027A.
Nkunganire izaba ingana na 46% kuri DAP, 45% kuri Urea, 43% kuri NPK 17-17-17, 45% kuri Kynoplus (Coated Urea), 36% kuri KCL/MOP, mu gihe Micro–nutrient Fertilizers na Blends zo zizahabwa Nkunganire ya 18%.
MINAGRI yasabye abahinzi gukurikiza amabwiriza n’inama bahabwa n’abashinzwe ubuhinzi, kugira ngo igihembwe cya 2027A kizagende neza, umusaruro wiyongere kandi ibikorwa by’ubuhinzi birusheho guhangana n’ingaruka z’imihindagurikire y’ikirere.
