BNR yagumishije inyungu fatizo kuri 6,75%
Ku wa 18 Ugushyingo 2025, Komite ishinzwe Politiki y’Ifaranga muri Banki Nkuru y’u Rwanda (BNR) yarateranye igamije gusuzuma uko ubukungu bw’imbere mu gihugu n’ubw’Isi buhagaze, ndetse no kuvugurura iteganyamibare ry’ubukungu. Muri iyi nama, komite yashyizeho igipimo cy’inyungu fatizo ku kigero cya 6,75% mu mezi atatu ari imbere, igifata nk’igipimo kiboneye mu gutuma umuvuduko w’izamuka ry’ibiciro uguma mu mbago ngenderwaho z’igihe kirekire.
Umuvuduko w’ibiciro ku masoko mu gihembwe cya gatatu cya 2025 wageze kuri 7,2%, uvuye kuri 6,7% mu gihembwe cya kabiri cya 2025. Ku rwego rw’umwaka wose, BNR iteganya ko ibiciro bizazamuka ku gipimo cya 6,9% mu 2025, mu gihe mu 2026 biteganyijwe ko bizagababuka bikagera kuri 5,8%. Guverineri wa BNR, Soraya Hakuziyaremye, yasobanuye ko iyi gahunda igamije gukomeza gushyigikira ubukungu bw’igihugu, ikoranabuhanga, ndetse no kugera ku mafaranga ahagije mu gihugu.
Mu kiganiro n’itangazamakuru kuri uyu wa Kane tariki 20 Ugushyingo 2025, hatangajwe ko ubukungu bw’u Rwanda bwazamutseho 7,8% mu gihembwe cya kabiri cya 2025, bitewe n’izamuka ry’ubukungu ryagaragaye mu nzego zose z’igihugu. Mu gihembwe cya gatatu, ibipimo by’ubukungu byihuse byerekanye izamuka rya 13,2%, byatewe ahanini n’ubwiyongere bw’ibikorwa byo mu rwego rwa serivisi n’urw’inganda, ndetse n’ikenerwa ry’ibicuruzwa mu gihugu.
Ku isoko mpuzamahanga, agaciro k’ibicuruzwa byoherezwa hanze y’u Rwanda kazamutseho 15%, ahanini bitewe n’izamuka ry’ibicuruzwa nk’amabuye y’agaciro na kawa, ndetse n’ibiciro byiza ku masoko y’isi.
Agaciro k’ibyoherezwa bitari ibisanzwe byiyongereye ku kigero cya 50,5%, bitewe n’ibikorwa byo gutunganya ibikomoka mu nganda z’imbere mu gihugu birimo amavuta yo guteka, ifu y’ingano n’ibiryo by’amatungo.
Ku rundi ruhande, agaciro k’ibitumizwa mu mahanga kazamutseho 7,4%, bitewe n’izamuka ry’ibiribwa byatumijwe hanze, cyane cyane ibigori n’imiti, bigatuma icyuho hagati y’ibyoherezwa n’ibitumizwa mu mahanga byiyongera ku gipimo cya 2,8%.
Ku isoko ry’ivunjisha, kugeza mu mpera za Nzeri 2025, agaciro k’ifaranga ry’u Rwanda ugereranyije n’idorari rya Amerika kagabanutseho 4,03%, gashyira mu rugero ruto ugereranyije na 6,49% mu gihe nk’icyo mu 2024. Ibi byatewe n’ihindagurika ry’idorari ku isoko mpuzamahanga, hamwe n’amavugurura mu bugenzuzi bw’isoko ry’ivunjisha hagamijwe gukumira imikorere idahwitse.
Mu rwego rw’imari, nyuma y’izamuka ry’igipimo cy’inyungu fatizo muri Kanama 2025, inyungu ku nguzanyo z’igihe gito zizamukana n’inyungu ku mafaranga abitswe mu mabanki, ariko inyungu z’igihe kirekire ku nguzanyo z’ubucuruzi zagabanutseho 1,40% zigera kuri 5,85% mu gihembwe cya gatatu cya 2025, ugereranyije na 7,25% mu mwaka ushize. Inyungu ku mafaranga abitswe mu mabanki zagabanutseho 1,69% zigera ku 8,67%, naho inyungu ku nguzanyo muri rusange zagabanutseho 0,28%, igabanuka ryagaragaye mu byiciro byose by’inguzanyo.
Umuvuduko w’izamuka ry’ibiciro bibarwa hatabariwemo iby’ibiribwa byangirika vuba n’ibikomoka ku ngufu byageze ku 8,1%, bivuye kuri 5,6%, mu gihe ibiciro by’ibikomoka ku ngufu byazamutse bikagera kuri 3,3%.
Ibi byiyongereye kubera izamuka ry’ikiguzi cy’ubuvuzi n’uburezi, naho ikiguzi cy’amacumbi cyaragabanutse. Ku rundi ruhande, ibiciro by’ibiribwa byangirika vuba byagabanutse bishingiye ku igabanuka ry’ibiciro by’imboga n’imbuto, nubwo ibiciro by’ibicanwa(inkwi, amakara) n’ibikomoka kuri peteroli byakomeje kuzamuka.
Iteganyamibare rya BNR rigaragaza ko umuvuduko w’ibiciro uzaguma mu mbago ngenderwaho, ku mpuzandengo ya 6,9% mu 2025 na 5,8% mu 2026. Umuvuduko w’ibiciro bibarwa hatabariwemo iby’ibiribwa byangirika vuba n’ibikomoka ku ngufu biteganyijwe ko uzaguma hejuru kugeza mu ntangiriro za 2026, mu gihe ibiciro by’ibiribwa bizagabanuka bitewe n’umusaruro mwiza w’ihinga n’igabanuka ry’ibiciro ku masoko y’isi. Nubwo hari icyizere, BNR yibutsa ko ihindagurika ry’ikirere n’amakimbirane ya politiki ashobora guhungabanya iri teganyamibare.
Hashingiwe kandi ku ishusho y’ubukungu n’iteganyamibare, Komite ishinzwe Politiki y’Ifaranga yafashe umwanzuro wo kugumisha igipimo cy’inyungu fatizo kuri 6,75%, ibona ko ari cyo gikwiye mu gihe umuvuduko w’ibiciro ukomeje kugenzurwa neza. Komite izakomeza gukurikirana ubukungu no gufata izindi ngamba mu gihe hagira impinduka zikomeye mu mubare w’ibiciro cyangwa ubukungu bw’imbere mu gihugu.
Umwanditsi: Alex RUKUNDO
