RNIT Iterambere Fund yigaragaje nk’inkingi y’ubwizigame n’ishoramari mu 2024

Kuri uyu wa kane tariki ya 08 Gicurasi 2025 Ubuyobozi bw’Ikigo Rwanda National Investment Trust (RNIT) Ltd mu kiganiro n’itangazamakuru bwavuze ko bwishimira umusaruro w’Ikigega RNIT Iterambere Fund (RIF) yungutse mu mwaka wa 2024,  umwaka waranzwe n’ibikorwa by’indashyikirwa mu bijyanye no kwizigamira no gushora imari. Ibyo bikorwa byagize uruhare rukomeye mu guteza imbere abashoramari n’ubukungu bw’igihugu muri rusange.

Guhera ku bwizigame bwakusanyijwe, ubwiyongere budasanzwe bw’abafunguje konti nshya zo kwizigamira, kugera ku mafaranga yasubijwe abanyamuryango bayasabye ngo abagoboke cyangwa bayakoreshe mu mishinga y’iterambere, iyi raporo yerekana ubudacogora bw’Ikigega RNIT Iterambere mu guteza imbere abaturage n’igihugu.

Mu mwaka wa 2024, Ikigega RIF cyakiriye miliyari 17.6 Frw, izamuka rya 45.6% ugereranyije na miliyari 12.09 Frw zakusanyijwe mu 2023. Ibi byatumye amafaranga amaze gukusanywa agera kuri miliyari 59.1 Frw, harimo n’ayasubijwe abanyamuryango. Iri zamuka ryatewe ahanini n’ubukangurambaga bwo kwigisha abaturage ku mibanire yabo n’amafaranga, n’akamaro ko kwizigamira, byanyujijwe mu bufatanye n’itangazamakuru, imbuga nkoranyambaga, no kwegera abagenerwabikorwa hirya no hino mu gihugu.

Mu 2024, abanyamigabane bashya biyandikishije muri RIF bavuye ku 19,495 (mu 2023) bagera ku 33,137, ari izamuka rya 69.97%. Ibi byerekana icyizere abaturage bagiriye Ikigega, kikaba gikomeje kwaguka mu mibare no mu bushobozi.

Uku kwiyongera kw’abashoramari kwabayeho kubera ubukangurambaga bukomeye bwanyujijwe ku mbuga nkoranyambaga nka Twitter, YouTube, na TikTok, ndetse n’uburyo busanzwe bwo kwegera abaturage. Ni ikimenyetso cy’uko RIF iri kugira uruhare rukomeye mu kubaka umuco wo kwizigamira no kwigira.

Inyungu y’umwaka (Annualized Return) ya RIF mu 2024 yari 11.78%, ikaba yarazamutse ugereranyije na 11.55% mu 2023. Iyi nyungu ishimangira ubushobozi bw’Ikigega mu gutanga inyungu zizewe, binyuze mu ishoramari rishingiye ku bushishozi n’ubugenzuzi, bigamije kwirinda ibihombo. Ibi byose bigamije kongera icyizere cy’abashoramari no kubafasha kwizigamira igihe kirekire.

Mu 2024, RIF yasubije abashoramari bakeneye kubikuza amafaranga yabo agera kuri miliyari 19.5 Frw, izamuka rya 656% ugereranyije na miliyari 2.58 Frw yishyuwe mu 2023. Ibi byerekana ko RIF ihagaze neza mu gusubiza ibyifuzo by’abashoramari bakeneye amafaranga yabo — yaba ku mpamvu z’ubuzima, ibyihutirwa, cyangwa kwinjira mu mishinga mishya.

Abenshi mu babikuje amafaranga bayakoresheje mu mishinga iciriritse n’iminini itanga imirimo ku bihumbi by’Abanyarwanda, bityo RIF igaragaza ko ishobora guhuza umutekano w’imari n’inkunga ku iterambere ry’igihugu.

RNIT Iterambere Fund ni Ikigega cy’ishoramari cyakira ubwizigame bukomatanyije, kigashyira amafaranga y’abantu ku giti cyabo, amatsinda, amakoperative, n’ibigo bya Leta n’iby’abikorera mu ishoramari. Giharanira kubafasha kugera ku ntego z’imari no gutanga umusanzu mu iterambere ry’igihugu.

Umusanzunews

Umwanditsi: Alex RUKUNDO

Email: rukundoalex540@gmail.com

Whatsap / Tel: +250 785 404 717