Wizkid yatangaje indirimbo nshya yahuriyemo na Young Jonn, anavuga kuri album nshya
Mu kiganiro akuze gukora gake cyane kuri Instagram Live, umuririmbyi w’icyamamare Wizkid yatangaje ko agiye gusohora indirimbo nshya yahuriyemo n’umuhanga mu njyana ya Afrobeats, Young Jonn.
Uyu muhanzi wahawe igihembo cya Grammy akomeje urugendo rwo gukorana n’abandi bahanzi muri uyu mwaka wa 2025. Kugeza ubu, amaze kugaragara mu ndirimbo yahuriyemo na Olamide Baddo, Ayra Starr, ndetse aherutse gutangaza ko agiye gukorana n’abandi barimo DJ Tunez na Fola. Muri icyo kiganiro yakoreye kuri Instagram Live, Wizkid yanatangaje ko ashobora gusohora album nshya muri uyu mwaka wa 2025, amakuru yakiranywe ibyishimo bikomeye n’abakunzi be.
Mu myaka itatu ishize, Wizkid yakomeje kuba ku isonga mu bahanzi bafite ijwi rikomeye mu muziki wa Afurika no ku rwego mpuzamahanga. Album ye Made In Lagos, yasohotse mu 2020, yamenyekanye cyane cyane kubera indirimbo Essence yahuriyemo na Tems, yageze ku rutonde rw’indirimbo zikunzwe muri Leta Zunze Ubumwe za Amerika. Nyuma y’aho, yakomeje kwagura ibikorwa bye akora ibitaramo mu mijyi itandukanye ku isi nka New York, Paris, London na Lagos.
Wizkid aherutse kumara igihe mu nzu itunganyirizwamo umuziki hamwe n’abahanga bo muri Amerika barimo Metro Boomin, umuraperi Gunna ndetse na Kid Laroi. Ibi byagaragaje ko ashobora kuba arimo gutegura umushinga wimbitse w’indirimbo zihuza injyana zitandukanye zirimo Afrobeats, Trap na R&B.
Iyo album nshya ari gutegura ishobora gusohoka vuba, nyuma y’umwaka umwe gusa asohoye album ye ya gatandatu yise Morayo. Iyo album ni yo yabaye iya mbere muri Afurika mu kugira umubare munini w’abantu bayumvise ku munsi wa mbere kuri Spotify.
Wizkid azwiho gushimisha abakunzi be abatangariza ibikorwa bishya aba yateguye, ariko akagaruka mu buzima bwe busanzwe budakunze kugaragaramo cyane mu itangazamakuru. Ibi bituma aguma ari umuhanzi ugira ubuzima bwite, ariko agahorana udushya.
Nubwo bimeze bityo, bamwe mu bafana be bashobora kutishimira ibyo yatangaje, kuko bivugwa ko adakunze gusohoza ibyo aba yasezeranyije abafana be ku gihe. Hari n’ababona ko bigoye kwemeza ko azasohora indi album vuba, mu gihe album Morayo irimo indirimbo 16 yasohotse mu Ugushyingo 2024.
Ariko uwo mushinga mushya ushobora kutaba album ndende, ahubwo ukaba ari Extended Play (EP)—uburyo Wizkid akunze gukoresha mbere yo gusohora album nyamukuru.
Mu 2019, yasohoye Sound Man Vol. 1 EP, yabanje album Made In Lagos yaje gutwara igihembo cya Grammy. Muri 2023, yanasohoye S2 EP, yabanjirije Morayo. Wizkid akomeje uwo murongo, aho ashobora gusohora EP ya gatatu muri 2025, izaba itegura album ye ya karindwi.
Uretse gukora ku giti cye, Wizkid azwiho kuzamura impano nshya mu muziki wa Afurika. Yagiye afasha abahanzi bato nka Terri, Tems n’abandi, akabaha umwanya ku ndirimbo ze no mu bitaramo mpuzamahanga.
Uyu muhanzi akomeje gutungurana cyane, kandi buri gihe aba afite ibikorwa bihishe. Ashobora no gusohora album itunguranye—ibi bikaba byaba ari ubwa mbere mu mateka ye asohoye LP ebyiri zikurikiranye mu gihe cy’imyaka ibiri.
Wizkid, umuhanzi wo muri Nijeriya, yavutse ku wa 16 Nyakanga 1990. Azwi cyane mu muziki ku izina rya Wizkid cyangwa Big Wiz. Amazina yiswe n’ababyeyi ni Ayodeji Ibrahim Balogun.
