Intambara muri Gaza: Israel ikomeje kunengwa n’amahanga ku bw’ingaruka ku basivile
Ibitero by’indege bya Israel byahitanye nibura Abanya-Palestina 50 muri Gaza ku wa Kabiri, nk’uko byatangajwe n’inzego z’ubuzima zo muri ako gace. Ibi bibaye mu gihe Israel ikomeje kugaba ibitero, nubwo igitutu cy’amahanga gikomeza kwiyongera, gisaba ko ihagarika ibikorwa bya gisirikare no kwemera ko ubufasha bugera muri Gaza nta nkomyi.
Ibitero byagabwe ku ngo ebyiri, aho abagore n’abana bari mu bantu 18 bahitanywe n’ibyo bitero, ndetse no ku ishuri ryacumbikiye imiryango yimuwe, hamwe n’ahandi hantu hatandukanye, nk’uko byatangajwe n’abaganga bo muri Gaza.
Ingabo za Israel zari zaburiye abatuye mu mujyi wa Khan Younis, mu majyepfo ya Gaza, ku wa Mbere ko bagomba kwimukira ku nkombe, biteguye “igitero kidasanzwe”, ariko ntacyo zahise zitangaza kuri ibyo bitero.
Abaganga bavuze ko ibitero byo kuri uwo wa Kabiri byagabwe muri Khan Younis no mu bice byo mu majyaruguru birimo Deir al-Balah, Nuseirat, Jabalia ndetse n’Umujyi wa Gaza.
Bavuga ko ibitero bya Israel bimaze guhitana abantu barenga 500 mu minsi umunani ishize, ubwo ibikorwa bya gisirikare byarushagaho gukazwa.
Ingabo za Israel zatangaje ku wa Mbere ko zemereye amakamyo atanu y’ubufasha kwinjira muri Gaza, nyuma y’igifungo cyamaze igihe kirenga amezi abiri, cyabujije ibiribwa n’ibindi bikenerwa kugera muri ako gace.
Ishami ry’Umuryango w’Abibumbye rimaze igihe ryemeza ko Gaza, ifite abaturage bagera kuri miliyoni 2.3, ikeneye nibura amakamyo 500 y’ubufasha n’ibicuruzwa bya buri munsi. Mu gihe cy’intambara, amakamyo atwaye ubufasha amaze ibyumweru n’amezi ahagaze ku mipaka ya Gaza, ategereje kwemererwa kwinjira.
Intambara imaze amezi 20 ikomeje kugora umubano wa Israel n’amahanga menshi, ndetse n’umubano wayo n’inshuti ya hafi cyane, Leta Zunze Ubumwe za Amerika, nawo utangiye guhungabana.
Abayobozi b’u Bwongereza, u Bufaransa na Canada baburiye ko ku wa Mbere bashobora gufata “ingamba zifatika” kuri Israel niba itahagaritse ibikorwa bya gisirikare muri Gaza kandi ngo ikureho imbogamizi ku bufasha bugenewe abaturage.
Mu itangazo ryatanzwe hamwe n’Umuryango w’Ubumwe bw’Uburayi n’ibindi bihugu 20, ibyo bihugu bitatu byanaburiye ko abaturage ba Gaza bahanganye n’inzara, kandi ko Umuryango w’Abibumbye hamwe n’amashyirahamwe y’ubufasha bagomba kwemererwa gukora akazi kabo nta nkomyi.
Mu gusubiza ku byo bavuze, Minisitiri w’Intebe wa Israel, Benjamin Netanyahu, yavuze ko igihugu cye kiri mu “ntambara y’umuco uharanira kurwanya ubwiyandarike” kandi asezeranya ko kizakomeza “kwirwanaho mu buryo buboneye kugeza ubwo Israel izatsinda.”
Mu rwego rw’igenamigambi ryashyizweho n’Abanyamerika na Israel, rikunze kunengwa cyane mu kugeza ubufasha, Ikigega gishya cyita ku mibereho myiza ya Gaza kigamije gutangira ibikorwa byacyo muri Gaza mu mpera za Gicurasi.
Intambara ya Israel yo ku butaka no mu kirere yashegeshe Gaza, yatumye hafi y’abatuye bose bimukira ahandi, kandi ihitana abantu barenga 53,000, benshi muri bo ari abasivile, nk’uko inzego z’ubuzima zo muri Gaza zibivuga.
Intambara yatangiye nyuma y’uko abarwanyi bayobowe na Hamas bagabye igitero ku baturage ba Israel hafi y’umupaka wa Gaza ku itariki ya 7 Ukwakira 2023, igitero cyahitanye abantu hafi 1,200, benshi muri bo ari abasivile, banafata abantu 251 ho imbohe, nk’uko imibare ya Israel ibigaragaza.
Abayobozi ba Israel bagaragaje ko bashaka gukura abashimuswe mu maboko ya Hamas no gusenya icyo cyiciro, bifashishije imbaraga. Netanyahu yavuze ko intego ya Israel ari ugufata ubuyobozi bwose bwa Gaza.
Hamas yavuze ko yiteguye kurekura imbohe mu gihe intambara izaba irangiye, kandi Abanya-Palestina bafunzwe na Israel bakarekurwa. Inama nshya zo kugerageza guhagarika intambara ku buryo butaziguye zibera muri Qatar hagati ya Israel na Hamas ntizigeze zitanga umusaruro.
Umwanditsi: Alexis NTAWIGENERA
Israe