AFC/M23 yatangaje ubuyobozi bushya bwa Kivu y’Amajyepfo
Ihuriro Alliance Fleuve Congo (AFC), ku bufatanye n’umutwe wa M23, ryatangaje ishyirwaho ry’ubuyobozi bushya bwa Kivu y’Amajyepfo, bishimangira impinduka zikomeye mu miyoborere y’iyo ntara, zijyanye no kuva ku butegetsi bwa Perezida Félix Tshisekedi.
Nk’uko biteganywa n’itegeko ryemejwe ku mugaragaro (No. 05/COORDO-PR/AFC-M23/2025), Birato Rwihimba Emmanuel yagizwe Guverineri mushya wa Kivu y’Amajyepfo, Dunia Masumbuko Bwenge agirwa Visi-Guverineri ushinzwe Politiki, Ubutegetsi n’Amategeko, mu gihe Gishinge Gasinizira Juvénal yagizwe Visi-Guverineri ushinzwe Ubukungu, Imari n’Iterambere.
Iryo tegeko rivuga ko impinduka muri iyi ntara zigamije ivugururwa ry’ubutegetsi bw’akarere, hongerwa ubunyangamugayo, imiyoborere myiza no kwegera abaturage. Ryemeza ko kuba hari icyuho mu buyobozi bw’iyi ntara ari imwe mu mpamvu nyamukuru z’iri tegeko.
Icyemezo cyasinyiwe i Bukavu na Bertrand Bisimwa, Perezida wa M23 akaba n’Umuhuzabikorwa wungirije wa AFC ushinzwe ibya politiki n’ib Diplomase, ndetse cyinashyirwaho umukono na Corneille Nangaa, Umuhuzabikorwa mukuru wa AFC.
Ibi bikorwa byerekana uburyo AFC/M23 ikomeje kwagura ubushobozi bwayo mu burasirazuba bwa DRC, aho uyu mutwe ukomeje kugaba ibitero no kwigarurira uduce twinshi. Ubuyobozi bushya butegerejweho gutangira gushyira mu bikorwa impinduka mu miyoborere y’iyi ntara, isanzwe izwiho kuba indiri y’ibibazo by’umutekano muke n’amakimbirane.
Iri tangazo ni ikimenyetso gikomeye cyo kwerekana ko AFC/M23 ihangariye ubutegetsi bwa Tshisekedi, ukanashimangira ubushake bwayo bwo kuba ubuyobozi bwemewe mu burasirazuba bwa Congo.
Umwanditsi: Alex RUKUNDO
Number: +250 785 404 717
