RDC: Abarwanyi ba M23 binjiye mu mujyi wa Kamanyola

Abarwanyi b’umutwe wa M23 binjiye mu mujyi muto wa Kamanyola, uri ku mupaka wa Repubulika Iharanira Demokarasi ya Congo (DRC), u Burundi n’u Rwanda, mu ijoro ryo kuri uyu wa Kabiri, nk’uko byatangajwe n’uyu mutwe.

Kamanyola iherereye muri teritwari ya Walungu, ikaba iri ku ntera ya kilometero 45 mu majyepfo ya Bukavu na kilometero 70 mu majyaruguru y’umujyi wa Uvira, ku nkombe z’ikiyaga cya Tanganyika.

Igisirikare cya FARDC ntacyo kiratangaza ku ifatwa rya Kamanyola, ariko Radio RFI yatangaje ko ku wa Kabiri habaye imirwano hagati ya M23 n’ingabo z’u Burundi zari zikambitse muri ako gace, mbere y’uko zihunga.

Amakuru avuga ko ingabo za FARDC zavuye i Bukavu n’izari zisanzwe ku mupaka wa Kamanyola zamaze iminsi zarahungiye mu mujyi wa Uvira.

Kamanyola ni agace kari mu kibaya cya Rusizi gafite amateka y’imirwano ikomeye. Mu 1964, ingabo za Armée Nationale Congolaise za Mobutu Sese Seko zahatsindiye inyeshyamba za Pierre Mulele. Hafi y’uyu mujyi hari ishusho y’abasirikare yibutsa ayo mateka.

Uyu mujyi wakundwaga na Mobutu Sese Seko wahoze ayobora Zaïre, ku buryo stade nini yubatse i Kinshasa mu 1994 yiswe Stade Kamanyola mbere y’uko ihindurirwa izina ikitwa Stade des Martyrs de la Pentecôte. Mobutu yanitiriye izina Kamanyola ubwato bwe bunini, nyuma buhindurirwa izina na Laurent-Désiré Kabila bukitwa Lemera. Yanagize kandi itsinda ryihariye mu gisirikare rye yise “Division Kamanyola.”

Amateka agaragaza ko urugamba rwa Kamanyola mu 1964 rwari ruyobowe na General Major Mobutu Sese Seko ubwe, mbere y’uko afata ubutegetsi mu 1965.

Gufatwa kwa Kamanyola na M23 – nyuma y’iminsi micye ifashe Bukavu – bituma benshi bavuga ko uyu mutwe ushobora kuba uri kugana umujyi wa Uvira, uwa kabiri mu bunini mu Ntara ya Kivu y’Epfo.

Ku rundi ruhande, imirwano yakomeje no muri teritwari ya Lubero, aho M23 bivugwa ko igenzura agace ka Alimbongo kari ku ntera ya kilometero 50 uvuye Lubero Centre, na 100 uvuye Butembo.