ISIRAYELI YAGABYE IGITERO CYO KUBURIRA KIGAMIJE KURINDA ABADRUZE BA SIRIYA

Isirayeli yatangaje ko yagabye igitero cyo kuburira, kigamije kurwanya umutwe w’abahezanguni wari uri gutegura igitero ku Badruze muri Siriya, igaragaza ko yubahirije isezerano ryayo ryo kurengera uwo mutwe muto w’abaturage. Ibi byabaye nyuma y’uko imvururu zakajije umurego mu duce twa Druze hafi y’umujyi wa Damasiko ku wa Gatatu.

Iki gitero ni kimwe mu bya vuba Isirayeli yagabye muri Siriya, aho ifata Abayisilamu b’aba Sunni bafashe ubutegetsi mu Ukuboza nk’inkomoko y’ikibazo gikomeye ku mupaka wayo. Isirayeli yahise yohereza ingabo mu majyepfo ashyira uburengerazuba, inasezeranya kurengera ubwoko bw’Abadruze.

Mu itangazo ryasohowe ku bufatanye, Minisitiri w’Intebe wa Isirayeli, Benjamin Netanyahu, hamwe na Minisitiri w’Ingabo Israel Katz, batangaje ko icyo gitero cyagabwe ku mutwe w’abahezanguni wari uri kwitegura kugaba igitero ku Badruze bo mu mujyi wa Sahnaya, uherereye mu majyepfo y’umurwa mukuru, Damasiko.

Isirayeli yatangaje ko yiteze ubutegetsi bwa Siriya bugira icyo bukora mu rwego rwo kurinda Abadruze ibibazo bishobora kubageraho.

Umuvugizi wa Minisiteri y’Ubutegetsi bw’Igihugu cya Siriya, wavuganye na Reuters ari i Sahnaya, yavuze ko nta kimenyetso na kimwe afite cyerekana ko hari igitero cyabaye.

Imvururu zishingiye ku madini zadutse ku wa Kabiri mu gace ka Jaramana gatuwe n’Abadruze benshi, hafi y’i Damasiko, hagati y’abarwanyi b’Abadruze n’Abayisilamu b’aba Sunni. Haravugwa ko abantu barenga 12 bahitanywe n’izo mvururu.

Abaturage bo muri Sahnaya batangaje ko ku wa Gatatu hose habaye imirwano ikaze mu mihanda. Elias Hanna, utuye ku nkengero z’ako gace, yagize ati: “Turi mu bwoba bukabije no mu gihunga gikomeye kubera ibisasu biri kurashwa uko bwije n’uko bukeye, bititaye ku hantu. Duhungira mu nzu tukayifungirana.”

Yakomeje agira ati: “Dufite impungenge ko ubwicanyi bwabereye ku nkombe bushobora gusubirwamo hafi ya Sahnaya, bugakorerwa Abadruze.”

Isirayeli ifite umubare muto w’Abadruze, harimo n’abagera ku 24,000 batuye mu misozi ya Golan yigaruriwe na Isirayeli ubwo yayamburaga Siriya mu Ntambara y’iminsi itandatu yo mu 1967. Mu 1981, Isirayeli yaje kwiyomekaho ako gace, icyemezo kitigeze cyemerwa n’ibihugu byinshi ndetse n’Umuryango w’Abibumbye.

Isirayeli imaze amezi menshi isaba Leta Zunze Ubumwe za Amerika gushyigikira ko Siriya iguma mu bukene n’ubutegetsi butari bwunze ubumwe. Isirayeli kandi yagiye igaba ibitero muri Siriya kenshi mu gihe cy’ubutegetsi bwa Bashar al-Assad, igamije kugabanya uruhare rwa Iran, umufatanyabikorwa ukomeye wa Assad.