SADC yatangiye icyiciro cya kabiri cyo gusubiza ingabo n’ibikoresho byari mu butumwa bwa SAMIRDC muri RDC
Umuryango w’Iterambere ry’Afurika y’Amajyepfo (SADC) watangiye icyiciro cya kabiri cy’ikorwa ry’ubutumwa, ku wa Kane tariki ya 12 Kamena 2025, aho hateganyijwe gusubiza mu bihugu byabo abakozi bari mu butumwa, ibikoresho byabo bwite ndetse n’ibindi bikoresho bisigaye.
Nk’uko byagaragajwe n’itangazo ryasohowe, ingabo za SADC ziri mu butumwa bwa SAMIRDC kugeza ubu ziri mu duce twa Goma na Sake, ziteganyijwe koherezwa muri Tanzaniya. Aho, ingabo za Tanzaniya zizakomereza urugendo rugana i Dar es Salaam, mu gihe iz’Afurika y’Epfo n’iza Malawi zo zizagarurwa mu bihugu byazo hifashishijwe indege.
Umuryango wa SADC wagaragaje ko ugikomeje kwiyemeza no kwitanga mu buryo budacogora mu rugendo rwo kugarura amahoro, umutekano n’ituze mu gihugu cya Repubulika Iharanira Demokarasi ya Kongo no mu karere muri rusange.
Iryo tangazo rigira riti:“ Nubwo ubutumwa bwa SAMIRDC buri hafi kurangira, SADC izakomeza gushyira imbaraga mu nzira z’ububanyi n’amahanga, politiki n’ingamba zifatanyije na Guverinoma ya Kongo ndetse n’abandi bafatanyabikorwa bo mu karere.”
Tubibutse ko icyiciro cya mbere cy’ikorwa ry’ubutumwa cyatangiye ku wa 29 Mata 2025, cyibanda ku gukura ibikoresho n’ibindi byifashishwa mu butumwa.
Umwanditsi: Alex RUKUNDO
Email: rukundoalex540@gmail.com
Whatsap / Tel: +250 785 404 717
