My Best Future Show: yahuje abanyeshuri mu bukangurambaga ku buzima bw’imyororokere

Ku wa Gatanu, tariki ya 9 Ukwakira 2026, abanyeshuri bo mu bigo bitandukanye bahuriye muri St Francis Good Shepherd B TSS mu bukangurambaga bugamije kubafasha gusobanukirwa ubuzima bw’imyororokere, kwirinda ibyabashyira mu kaga no gufata ibyemezo biboneye ku buzima bwabo n’ahazaza habo ndetse hanahembwa abana batandukanye bakoze amarushanwa y’ibazwa.

Iki gikorwa cyateguwe na My Best Future Show, ikiganiro gitambuka kuri Radio Umucyo 102.8 FM, ku bufatanye na Radio Community Umucyo, SAYE Company Ltd/Dukataze ndetse na St Francis Good Shepherd B TSS yakiriye igikorwa.

Cyari gifite insanganyamatsiko igira iti “Healthy Choices, Bright Futures”, bisobanuye ngo “Ibyemezo byiza, ahazaza heza”, kikaba cyari kigamije guha urubyiruko amakuru yizewe ku buzima bw’imyororokere no kurushishikariza gufata ibyemezo birinda ubuzima n’intego zarwo.

*Rukundo Munezero Fabrice Umufashamyumvire muri Saye Company Ltd/ Dukataze*

Mu bigo byari byateganyijwe kwitabira iki gikorwa harimo GS Mburabuturo, St Philip , Charles de Jesus TSS, na St Francis Good Shepherd’s B TSS. Ibi bigo byose byari byahuriye mu biganiro no mu marushanwa y’ubumenyi ku buzima bw’imyororokere.

Uretse ibiganiro bigamije kongera ubumenyi bw’abanyeshuri, igikorwa cyateguwe ku buryo cyifashisha ibibazo n’ibisubizo mu marushanwa hagati y’ibigo by’amashuri, hagamijwe gufasha urubyiruko gusobanukirwa neza ibyo rwiga no kubasha kubishyira mu bikorwa.

Munezero Fabrice Umufashamyumvire muri Saye Company Ltd/ Dukataze yagarutse kuri zimwe mu ngingo zari zigize gahunda harimo kumenya umubiri w’umuntu, kwirinda virusi itera SIDA n’izindi ndwara zandurira mu mibonano mpuzabitsina, gusobanukirwa inda zitateganyijwe ndetse no guhitamo ibirinda ubuzima n’ahazaza h’urubyiruko. Nyuma yo kuganira n’aba banyeshuri yabakoresheje amarushanwa maze Uwiduhaye Honoline wiga kuri GS Mburabuturo aza ku mwanya wa mbere anatwara igikombe n’ibindi bihembo bitandukanye byatanzwe n’iyi Company.

*Uwiduhaye Honoline ni umunyeshuri mu kigo cya GS Mburabuturo yaje ku mwanya wa mbere*

Umwanya wa kabiri wegukanywe na Habimana Jean Louis wiga kuri St Philip nawe yahawe ibihembo bitandukanye byatanzwe na Saye Company.

Radio Umucyo hamwe n’abakora ikiganiro My Best Future Show batanze ibihembo bitandukanye ku banyeshuri bose bitabiriye iki gikorwa birimo ibikoresho by’ishuri ndetse na Certificates

Abateguye igikorwa bagiteguye nk’uburyo bwo guhuza uburezi, ibiganiro n’imikino kugira ngo abanyeshuri babone umwanya wo kwiga, kubaza ibibazo no kugerageza ubumenyi bwabo mu buryo bubashishikaza.

Alphonse Munyankindi Umuyobozi w’ikiganiro My Best Future Show yagarutse ku ntego y’iki kiganiro avuga ko kigamije guteza imbere impano z’urubyiruko, ubumenyi, kwihangira imirimo, amahirwe y’akazi n’ibindi bibazo bireba imibereho yarwo. Gushyira ubuzima bw’imyororokere muri gahunda zacyo ni uburyo bwo gukoresha itangazamakuru mu kugeza amakuru y’ingenzi ku rubyiruko.

*Habimana Jean Louis wiga kuri St Philip nawe yahawe ibihembo na Saye Company / Dukataze*

Ibi bije mu gihe amakuru y’ubuzima bw’imyororokere agikenewe mu gufasha abangavu n’ingimbi gufata ibyemezo bishingiye ku bumenyi. Raporo y’Ubushakashatsi ku Buzima bw’Abaturage n’Imibereho Myiza mu Rwanda ya 2025 igaragaza ko 8% by’abakobwa bafite imyaka 15–19 bari barigeze gutwita.

Iyi mibare igaragaza akamaro ko gukomeza ibikorwa byigisha urubyiruko, bikaruhuza n’amakuru yizewe n’ubufasha bukwiye.

Mu butumwa bw’iki gikorwa, insanganyamatsiko igira iti “Your Health. Your Choice. Your Future”, mu Kinyarwanda ikaba “Ubuzima bwawe. Icyemezo cyawe. Ejo hawe”, ishimangira ko kumenya amakuru yizewe no gufata ibyemezo biboneye ari ingenzi mu kubaka ahazaza heza.

*Rabia Nkuriyingoma yari ahagarariye Umuyobozi mukuru wa SAYE Company / Dukataze*

Alphonse Munyankindi yagaragaje icyerekezo cyo gukomeza gukoresha ibiganiro kuri radiyo ndetse no mu mashuri atandukanye mu gihugu hose hakorwa amarushanwa k’aya ndetse banageza ubutumwa ku rubyiruko mu bice bitandukanye by’igihugu.