Amerika yahaye Ukraine miliyari 20 z’amadolari y’Abanyamerika akomoka k’umutungo w’Uburusiya
Leta Zunze Ubumwe za Amerika zahaye Ukraine miliyari 20 z’amadorari y’Abanyamerika akomoka ku nyungu z’umutungo w’Uburusiya wafashwe.
Iki ni igice kinini cy’inkunga ya miliyari 50 z’amadorari, ibihugu bigize itsinda rya G7 by’ibihugu bikize ku isi byiyemeje gutanga muri Kamena.
Minisitiri w’imari wa Leta Zunze Ubumwe za Amerika, Janet Yellen, avuga ko gutanga inkunga kuri Ukraine binyuze ku mutungo w’Uburusiya wafashwe bisobanura ko Uburusiya bugomba “gutwara umutwaro w’intambara yabwo itemewe n’amategeko aho kuwusigira abasora”.
Ibi bibaye mu gihe hasigaye ibyumweru bike ngo Perezida Joe Biden wa Amerika ahangane na Donald Trump uherutse gutorwa mu matora y’ibanze, aho Trump avuga ko ashaka kurangiza intambara yo muri Ukraine vuba amaze kugera ku butegetsi.
Trump avuga ko inkunga y’amafaranga ihabwa Ukraine ari igihombo ku bukungu bwa Amerika, bikaba biteye impungenge niba ubutegetsi bushya buzashobora gukomeza gutanga inkunga kuri iki gihugu gihanganye n’Uburusiya.
Ku wa Kabiri w’iki cyumweru, Minisiteri y’Imari ya Amerika yatangaje ko yohereje miliyari 20 z’amadorari muri Banki y’Isi, aho Ukraine ishobora kubona iyo nkunga.
Ayo mafaranga ari muri Banki y’Isi ntabwo ashobora gukoreshwa mu bikorwa bya gisirikare.
Ubutegetsi bwa Amerika bwari bwizeye ko igice cy’ayo mafaranga gikoreshwa nk’inkunga ya gisirikare, nk’uko ikigo cya Reuters gikora itangazamakuru kibitangaza, ariko byasabaga ko inteko ishinga amategeko ya Amerika ibanza kubyemeza.
Byafashe amezi menshi, kubera kutumvikana kw’abanyapolitiki mu nteko ishinga amategeko, mbere y’uko inkunga ya miliyari 61 z’amadorari igenewe Ukraine yemezwa muri Mata uyu mwaka.
Iyi nkunga ya miliyari 20 izatanga “icyuho cyihariye” ku gihugu kirwana “mu ntambara kitihitiyemo”, nk’uko Yellen abitangaza mu itangazo rye ryo ku wa Kabiri.
Iyi nkunga yatanzwe nyuma y’amezi menshi y’ibiganiro hagati ya Amerika n’abafatanyabikorwa bayo barimo Umuryango w’Ubumwe bw’Uburayi, ku buryo umutungo w’Uburusiya ubarirwa muri miliyari 325 z’amadorari wafashwe kuva iki gihugu cyatangiza intambara yeruye kuri Ukraine mu 2022, wakwifashishwa.
Mu Ukwakira , G7 yemeye gukoresha inyungu zikomoka kuri uwo mutungo – zibarirwa muri miliyari eshatu z’amadorari ku mwaka – mu gusohora inguzanyo ya miliyari 50 z’amadorari mu myaka 30. Gutanga iyo nkunga byari byitezwe gutangira mu mpera z’uyu mwaka.
Ubumwe bw’Uburayi bwiyemeje gutanga miliyari zirenga 18 z’ama-euro (ifaranga ry’Uburayi) zizakusanywa muri ubwo buryo.
Yellen avuga ko izi miliyari 50 z’amadorari zigamije gufasha Ukraine kubona “ubushobozi bukeneye kugira ngo ishobore gukomeza ibikorwa by’ubutabazi, ubuvuzi, n’ibindi by’ingenzi bifasha ubutwari bwayo mu kwirwanaho.”
Ibi bibaye mu gihe gikomeye ku ngabo za Ukraine ziherutse gutakaza ubutaka.
Uburusiya buri kongera kwigarurira ubutaka mu burasirazuba bwa Ukraine no mu ntara ya Kursk mu Burusiya – aho ingabo za Ukraine zakoze igitero mu mpeshyi – mu gihe ibintu bikomeje kuba bibi ku ruhande rw’ingabo za Ukraine ku rugamba.
Umwanditsi: Alex RUKUNDO
