M23 yigaruriye akandi gace ka Pinga ko muri Teritwari ya Walikale

Umutwe wa M23 kuri uyu wa Mbere tariki ya 28 Ukwakira, wigaruriye agace ka Pinga ko muri Teritwari ya Walikale.

Pinga isanzwe ifatwa nk’ibirindiro bikuru by’umutwe witwaje intwaro wa NDC-R uyoborwa na ’Gen’ Guidon Shimiray Mwissa, akaba ari na we uyobora ry’imitwe ya Wazalendo.

Aka gace gasanzwe kabamo ikibuga cy’indege nto ni na ko kabereyemo inama yatangirijwemo ubufatanye bw’imitwe yitwaje intwaro irwanya M23 bwaremye Wazalendo muri Gicurasi 2022.

Ni inama yitabiriwe n’inyeshyamba nkuru n’abofisiye bakuru b’igisirikare cya RDC.

M23 yigaruriye Pinga nyuma y’imirwano yaramutse iyisakiranya n’ihuriro ry’ingabo za Leta ya Guverinoma Iharanira Demokarasi ya Congo.

Aka gace kafashwe mu gihe mu cyumweru gishize na bwo M23 yigaruriye utundi duce dutandukanye two muri Teritwari ya Walikale, turimo aka Kalembe gaherereye mu bilometero bibarirwa muri 20 uvuye i Pinga.

Umwanditsi: Christophe NTIBANYURWA